 |
| Kiko Anwar. (mandingterkini.com) |
PARA’ PELEYAN
Bila ampon para’ peleyan
Bannya’ oreng anyar entar ka taneyan
Apareng pan-saponapan bantowan
Dha’ masyarakat disa se luman
Seddheng e kottha masyarakadda ampon oning
Ja’ se ebagi garowa laggu’ daddi ladding
Se bisa ngerra’ ponapa bisaos
Tamaso’ iman tor agamana se khos
............................................
NYOPPRE BAROKAH
Neng astaepon Sayyid Yusuf Talango
Langkong malem Kemmis tanggal dhupolo
Aba’ ajaring berkat
Adu’a menta sehat
Dha’ Pangeran se agandhu’ rahmat
Atawassul kalaban esto
Nyoppre barokaepon wali penggir polo
Sabellun gubar tasbih ebitong
Nyo’on odhi’ tamba ontong.
............................................
MENCAR
Saamponna tello bulan tello lekor are
Ate rassa petteng tadha’ nera’e
Bulan tor bintang ta’ etangale
Kaalang loka se tamba raja sabban are
Le’, dika amet entara ka pasar
Tape le-molena dika menta mencar
Ampon pa’taon pa’bellas bulanan
Bula ban dika apolong tadha’ cocoban
Maddha kaneserre ana’na
Sabban malem nanges atanya emma’na.
............................................
NGAJI
Bakto jaman gi’ sakone’ tivi
Na’-kana’ ka langgar senneng ngaji
Seddheng jaman mangken langgar tor masjid edinggalagi
Na’-kana’ lebbi senneng ales pribadi
Nabang nilai tor ijasa se tenggi
Bila raja olle daddi pegawai negeri
Jaman ampon aoba
Tandha keyamat ampon para’ rabuwa
............................................
OMBA’ ANYAR
Alomampa alengleng Songennep
Bannya’ kabar sapedha tor motor se nongngep
Akadi nompa’ parao
Garowa omba’ anyar olle dika tao.
............................................
DHAPA’
Qo’idah kapeng petto’ se emaos towan guru
Ampon dhapa’ dha’ jaman se salbut onggu
Oreng-oreng akaton lajangan
Ekebbat angen lomok dhari atoran
Lebbi senneng noro’e oca’na setan
Jalan tor ajaganna epadaddi lalampan
Dhu, kastaba ce’ ekarassana
Reng seppo ngarabat dhari kene’na
Bila pon raja pottrana ce’ morsalla
Senga’ senga’ senga’ senga’
Towan guru apareng parengeddan
Saamponna sobbu reng seppona adinggal
.............................
REPOT
Repot onggu jaman sanonto
Bila ojan menta panas
Bila panas menta ojan
Se misken menta pasogi
Bila pon sogi aherra loppa
Loppa ka asalla
Loppa ka kancana
Loppa ka sadajana
Nangeng oreng loppa ban pamaloppa
Samangken malarat bida’anna
Akadi paraban tor randha
Manes tape make’dhadha.
............................................
HAJJIYAN
Sabban taon bannya’ oreng entar ka Mekka
Kaangguy ahajji tor aumroh
Sabban bulan bannya’ oreng entar ka Madinah
Kaangguy adu’a neng e pasareyanepon rasulullah
Tape saamponna abali ka Indonesia
Rassaepon sakone’ se katarema
Sabab atena loppa ta’ ebakta
Otaba neyattepon se pajat sala.
Songennep.
............................................
MASJID JAMI'
Masjid se dhimin ebangun sareng Ulil Amri
Mangken coma ekagabay tempat aselfie.
Songennep.
Tags
Puisi